陳玉蓮
退休小學教師陳玉蓮是水口村陳氏家族第九代原居民，也是村長陳玉基（基哥）的長姊。童年於水口村成長，從小跟家人務農，閒時與弟妹、親戚在村中就地取材玩樂，生活無憂。小學畢業後，她隨親戚搬到荃灣升學和工作。雖然離開水口多年，但她一直感激親人的照顧，自己也用心照顧家人，延續着家庭的溫暖。
採訪／朱皓澄｜攝影／朱煒傑｜編輯／王家文
1956 年我喺屋企出世，唔係去醫院㗎，係叔婆幫媽媽接生。我係大女，有兩個細佬、三個妹妹，最細嘅細佬就係𠵱家嘅水口村村長1。 以前嘅生活都算無憂無愁，唔使返學耕田嘅時候會同細佬妹、親戚喺村入面玩。近住鄉村士多2嗰條坑以前好乾淨，有魚有蝦，細佬妹會落去游水，我唔識就唔去啦。 我哋又成日去海灘掘蜆、曬蜆肉，幾高興呀！仲試過喺田入面玩煮飯仔，用石仔搭爐，執柴生火，再用舊煲或鐵罐「煲泥」，扮煮嘢食。 記得有個堂妹鍾意搵條毛巾包住個頭扮花旦，企喺床上面唱《帝女花》，搞笑到極！以前無電視睇，我哋同爺爺嫲嫲一齊聽收音機播大戲。有時大浪灣、大澳、長洲有神功戲，我哋又去睇，仲見過任白3。 屋企除咗種禾，仲有種蔥、菠蘿、番茄、蓮藕、菱角、慈菇、馬蹄。爺爺識得安排邊度種乜嘢，靠近馬路嘅田乾啲，用來種禾；近水源嘅田濕啲，種蓮藕、慈菇、馬蹄，菠蘿就種喺山上面。有時坐喺田頭會聞到番茄成熟嘅香味，喺蓮藕田又聞到蓮花香。 我自細跟爺爺嫲嫲、爸爸媽媽耕田。有一年新年，我哋本來着晒靚衫拜年，點知收到消息話啲蔥價錢好，即刻全家換衫落田抆蔥。我亦識種禾，仲會幫手犁田翻土。牛喺前面拖住個犁，我就喺後面揸住，畀隻牛一行一行咁翻鬆啲泥。呢個時候啲泥仲好乾，需要加水灌溉，等啲泥浸軟後再耙鬆佢。我揸住個耙頂，牛拖住個耙向前行，啲泥鬆返就可以插秧啦。秧苗會先種喺秧苗田，我要用禾苗鏟連根帶泥咁鏟起，搣開成一執執，再插返落田度。 我好怕畀蜞乸（水蛭）咬，好痛㗎！但有水嘅田就有蜞乸，蓮藕田、禾田都有，避無可避。所以我話畀自己聽，一定要努力讀書，唔再耕田。 細個時讀水口學校4，校監係馮有昇，佢係我大舅公。學校有三位老師，宋主敬老師5教英文，潘生教中文，校長黃生教數學。黃生住喺我哋隔離屋，放咗學可以去問功課，免費補習！嗰時成績算係唔錯，都唔會考包尾嘅，後來出荃灣讀中學，有幸入到林護（聖公會林護紀念中學）讀書。但有村民叫我爸爸媽媽唔使畀個女讀咁多書，好在佢哋冇理，仲好支持我。爸爸特登擺咗5,000蚊喺滙豐銀行，話一定夠供我讀書，派咗粒定心丸畀我。嗰陣時係七十年代，工廠工人一年都未必賺到5,000蚊。
因為政府要起石壁水塘，叔公叔婆、舅父、姨姨一家搬咗去荃灣石碧新村。佢哋好照顧我㗎，我喺荃灣讀中學，就係同佢哋一齊住。放長假時我會返水口，首先要喺荃灣搭船經青衣去中環，然後轉船經坪洲去梅窩，最後搭大嶼山巴士入水口，全程超過兩個鐘，要搭好耐。所以有時肚餓，我會喺船上買碗麵食。嗰陣時屋企仲有耕田，我返到去會幫手。每次放完暑假我都會喊，因為唔捨得屋企人。 中學畢業後我做咗老師，細佬妹都開始出來讀書、工作，我哋就向其他親戚租房住，都係荃灣區，住過河背街、楊屋道、鹹田街。我教嘅第一間學校叫諸聖小學，係大窩口一間天台學校。教滿兩年有資格報讀在職教師訓練班，就轉咗去神召會九龍灣學校（神召會港澳區議會九龍灣學校），一邊教書一邊讀書，兩年後畢業。1980年我經人介紹到大澳公立學校教書，就搬返水口同屋企人住。 嗰段時間我哋屋企咁啱起新屋，爸爸本身做工程，帶住成班仔女同親戚一齊起屋。放工之後如果唔使出市區上堂進修，我會返新屋地盤幫手推泥車、紮鐵。有個堂阿叔仲話我「返工揸粉筆，放工揸鐵筆」！ 1982年我轉去新界神召會惠群小學教書，所以搬返去荃灣住，兩年後買咗綠楊新邨嘅單位，一直住到𠵱家。我間屋好熱鬧㗎，有兩個妹妹都跟我住，直到佢哋結婚先搬走。大細佬兩公婆都喺度住過，弟婦生咗個女後都係喺度坐月！之後又到我自己結婚，生咗阿仔。
後來老爺同爸爸相繼過身，我就接咗奶奶同媽媽過嚟住。佢哋一拍即合，成日一齊去飲茶、行街，十足孖公仔，街坊仲以為佢哋係兩姊妹。嗰陣時阿仔讀緊幼稚園，有時放學後工人湊佢去茶樓搵嫲嫲同婆婆。如果我早收工，都會同佢哋一齊飲茶。 真係好感激爺爺嫲嫲、爸爸媽媽、叔公叔婆、舅父姨姨，仲有好多好錫我嘅親人。佢哋湊大我、照顧我，支持我讀書，又畀地方我住，就好似我人生裏面嘅天使，令我有好多家庭溫暖，先至有今日嘅我。