撰文／張凱琳｜攝影／朱煒傑｜編輯／王家文

我喺1943年出生，係長洲人。求學時期，我有好多次「第一」，從長洲官立學校畢業後，學校剛好開設第一屆初中課程，我考得上，唔使出港島讀中學。中三會考後，學校再開辦第一屆高中課程，我又考上，仲年年考到獎學金，多謝上帝。後來我報考羅富國師範學院（簡稱羅師，1967年改為名羅富國教育學院），主修視覺藝術，副修英文。 羅師係好開放嘅師範學院，學生唔需要着校服返學。我好認同學校嘅堅持：「搣唔甩學生形象，點做老師？」我喺羅師修讀一年制課程，1964年入學，上下學期各有三個月到小學實習。實習比讀書考試更重要，教授會去學校睇你教學方法、能否控制班上秩序，校長也會寫評語。同屆同學有三分一畢唔到業，唔容易㗎。羅師畢業後我去小學教書一年，其間教育署（教育局前身）會派督學嚟視學，順利通過才正式成為檢定教師。

我喺大角咀一間私校教過兩年半書，月薪好高。小學分上、下午班，教上午班有600蚊，兼教下午班有1,000蚊，另外再教埋夜校就有1,300蚊。但私校唔似津貼學校按年資加人工，當時喺水口學校教書嘅舊同學想辭職，就說服我轉去水口學校頂替佢。 1967年，我同時去兩間離島小學教英文，做「點五教師」，即半職老師。一星期有兩日半去水口學校，兩日半去大小鴉洲公立學校。由長洲搭船到大鴉洲需要三個鐘，好多住港島嘅老師唔肯去教。村長兼校監吳錦泉話我係長洲人，捱慣水（船程），叫我拍硬檔，唔係就無人教到英文。我無所謂就應承咗。兩間小學學生人數都係50幾人，有些學生10多歲先入學。 水口學校算好，爭取到聘請兩個半老師來教書，上午班由年紀大嘅老師教，佢通常喺水口租屋住。下午班就由年輕教師負責，十二點半才回校，可以瞓晏啲。另外半個老師多數教英文，因為當時英文老師好難考，人數又少，老師要兼教兩間學校。當時老師之中，我算最後生。1969年我兼任校主任，主要睇住學校盤數（帳目），應付教育署審計每年查訪。1983年9月1日我出任水口學校校長，亦是最後一任，因為學生人數愈來愈少，學校最終於1989年停辦，我亦於1990年1月3日卸任。 鄉村學校同市區學校嘅學科、書本、功課都一樣，最大分別係上課時間，校主任或校長要根據農耕時間編排，尤其高年班學生常要做田務，每年收割稻禾嗰幾日學校唔會上堂（大約每年6月底至7月初，及10月下旬至11月下旬某些日子），我自己都會落田幫校監馮有昇割禾。

初時去水口學校教書，我頂唔順往返梅窩嘅巴士班次太疏落，好快就買私家車用。有一段時間我住喺水口村，方便往返學校。我係村裏第一個購入黑白電視，傍晚學生會聚埋一齊睇電視，電視接收到乜信號我哋就睇乜，最記得有澳門賽車。我同村民關係幾好，有次村長提我就快過節，我以為要扲荷包（出錢），原來係叫我擺兩個竹籮喺學校門口，村民會送嘢畀我。譬如農曆新年有雞、年糕；中秋節有芋頭；農作物收成季節有菠蘿、番鬼荔枝（釋迦）。村民對老師好到不得了，學生好乖、純樸，家長好注重仔女學業。 我好似大細路一樣，放學後跟學生上山摘野果、捉金錢龜；夜晚擔一盞大燈到沙灘捉蟹、捉魚，學生教識我好多生物。有時村中有死雞，我哋會攞去水口灣嘅大涌，用幾嚿石壓住佢，夜晚就會引嚟好多中華絨螯蟹，我哋便捉蟹返屋企煲粥，成煲粥都係蟹膏，好豪華。我又會去上環菜種行買魚藤，將根部揼爛、浸水，然後跟學生到水口菠蘿田高地，將浸成乳白色嘅魚藤水倒落河，大涌嘅塘虱、山斑魚遇到刺激，會即時浮出水面吸新鮮空氣，我哋就趁機捕捉。第二日朝早，下游近泥灘的坑鰻（花錦鱔）也出來。 離開水口學校後，我去長洲錦江小學做美勞老師，學生攞好多獎㗎。我退休後不時都有跟學生聯絡，去港島、長洲飲茶敍舊，佢哋都已經70幾歲，有啲已經上咗天堂了。