撰文／張凱琳｜攝影／朱煒傑、陳浩倫｜編輯／王家文

我喺1969年出世，爸爸陳錦發係水口村原居民，媽媽池樹蘭從石壁嫁過來，我係孻仔，有六兄弟姊妹。七十年代中，爸爸無再耕田，出去中環打地盤工賺錢。後來，媽媽亦出市區做雜工，我就由家姐照顧。1960年政府起石壁水塘，好多親戚搬到荃灣石碧新村。大家姐最先跟舅父住喺石碧新村，後來做咗小學老師。 我七歲時喺水口學校讀過一年書，之後就出荃灣讀小學，同幾個家姐一齊住。自小學三年級開始，每逢星期五下晝放學，我就自己坐船返水口，週末同村中小朋友玩。中三輟學後，我曾經喺製衣廠打工，再轉行做裝修師傅。當時阿爸阿媽住喺水口，我經常返去探佢哋。我28歲結婚，太太都係水口村民，青梅竹馬長大，婚後我哋同阿仔住喺青衣。爸爸過身後，為咗照顧媽媽，我喺1997年搬返水口長住，太太同阿仔之後亦搬返來。細女出世後就一直喺水口成長。現時我哋住緊嘅兩層村屋，就係爸爸喺我三歲時親自起嘅。 ＊ ＊ ＊ 搬返水口長住後，我開始喺大嶼山接啲小型工程來做，結識咗好多村民。當有人要放租或搵屋，都會搵我幫忙介紹。我工作時間又彈性，當條村有突發事情，隨時可以揸車返來幫忙。曾經有個老人家自己一個人喺屋企，半日無聽仔女電話，所以仔女搵我幫忙。我去到拍門但無人應，就爬水管上二樓，見到老人家迷迷糊糊坐咗喺地，即刻送佢去醫院。 2011年，上屆村長（原居民代表）無意連任，其他村民游說我去參選，話我長年住喺水口，人脈廣，又可以隨時應付突發事情。佢哋仲鼓勵我：「有我哋撐住！」我做咗村長已經14年，每個月都去貝澳出席大嶼山南區鄉事委員會會議。近八年來，陸續有團體喺水口村做啲保育工作，包括城市日記、世界自然基金會香港分會（WWF）、香港觀鳥會同中大建築學院等，我亦會加入討論同諮詢村民意見。 村長職務唔算繁重，但好多時候需要處理瑣碎又緊急嘅事情。例如村民屋企電箱跳掣、水喉出問題、車路被塞，或者村民唔記得帶鎖匙，要搵人開鎖。當有人打電話畀我，我都盡量幫忙。我唔係好鍾意出席社交聚會，而係想幫水口村執得企企理理、做好啲建設，例如鋪好小路石屎路面、清理工程遺留嘅泥頭同垃圾。上年，我喺水口鄉公所屋頂安裝太陽能板，亦參加「可再生能源上網電價計劃」，畀中電回購電力。 村務工作要靠村民一齊做。我哋水口村原居民以四戶分為一組，每年輪流喺節慶日子打點大小事情、訂購到會食物等，亦會喺農曆十二月廿六日尾禡酬神，幫忙攞燒豬、分豬肉。每年農曆正月二十日，原居民喺鄉公所舉辦村務會議，又稱「年廿會」，處理村中行政、財政事務，同埋進行交接，畀下一組跟進來年村務。

水口村有兩個村民自發組織，其中一個係大嶼山水口村體育會，喺八、九十年代好活躍。村民組織足球隊，代表水口村參加大嶼山運動比賽，我同阿榮¹（陳就榮）都係球隊成員，捧過唔少獎盃㗎！水口村體育會每年都會喺鄉公所外空地舉辦盆菜宴，畀大家聚埋高興一下。 另一個組織係福源堂體育會，由我同六個子姪喺2001年創辦，組成福源堂醒獅隊，師從李潤福師傅。李師傅係潤福堂（香港）國術龍獅總會創辦人，佢哋嘅醒獅隊曾代表香港參加多項龍獅藝錦標賽同國術賽事。當年，我哋跟師傅上五堂課，加上頻密操練，之後就開始去附近鄉村表演助慶。現時福源堂醒獅隊有20幾個成員，農曆新年就特別忙，初一去大嶼山大浪灣村，初二喺水口村，初三去寶蓮寺同靈隱寺等。另外，每年塘福村盆菜宴同梅窩大地塘村北帝誕，村民都會邀請我哋去舞獅，畀我哋可以過過癮。 年初二水口村開年，醒獅隊全日敲鑼打鼓，響遍全村。相比南大嶼其他鄉村只做拜神儀式，水口顯得特別熱鬧。自十年前起，醒獅表演吸引好多鄰近村民來湊熱鬧。我哋醒獅隊先喺陳氏宗祠外進行簪花掛紅同點睛儀式，再抬住燒豬到閘門（界石）、大王爺同社壇拜神，為全村祈福。之後村民會齊集喺祠堂外切燒豬，互相拜年祝賀，然後各自返家食開年飯。如果村民有喺大門上「擺青」（掛上生菜），醒獅隊就會來採青，寓意送福。有幾個外籍村民好鍾意傳統文化，亦會入鄉隨俗，喺大門「擺青」攞個好意頭。水口村能夠維持濃厚嘅過節氣氛，可以畀下一代加深認識，承傳鄉村節慶文化，我覺得幾好㗎。