撰文／張凱琳｜攝影／陳浩倫、張凱琳、朱煒傑｜編輯／王家文

我會形容自己來自生境管理專業（Habitat Management Specialist），為了野生動物而做生境管理的保育工作。就讀香港大學理學士期間，我鍾意讀細胞的運作機制，了解生命背後的故事，亦打算主修生物化學，但每次做實驗時處理DNA、細胞等微觀事物，我睇唔見研究對象，覺得無成功感。與此同時，我開始跟着讀生態、環境科學的同學去觀鳥，從此好著迷，想保護一啲用肉眼便看得見嘅生物。可惜喺畢業要求限制下，我無法以主修生態學畢業。直到2019年我入讀港大環境管理理學碩士課程，終於能在生態相關的學系畢業，彌補了遺憾。 過去幾份工作有幸以唔同角度、管理方式接觸唔同嘅自然保護區，我覺得幾自豪。我做過米埔自然護理區生境管理，嗰度有基圍濕地、泥灘同魚塘。我哋定期降低基圍水位，畀水鳥過冬時嚟到濕濕地腳嘅淺水地方搵魚食。我又會踩單車去做生態調查，一邊觀察，一邊用錄音筆記低雀仔名，好舒服㗎。我亦曾在漁農自然護理署工作，喺大埔滘自然護理區、大帽山郊野公園等地方做森林管理，辦公室位於郊野公園，主要工作包括管理遊客設施、測檢樹木健康、協調和聯繫村民，以及郊野巡邏等。 人類適當地參與在環境之中，吸引動植物入嚟，係會令生態更豐富。有人覺得森林同郊野公園應盡可能保持自然，不加以干擾，但樹木也會老化，要睇情況補種。又例如若米埔基圍無人定時放水，雀仔見無魚食就唔會來，生態價值反而降低。所以我哋更加要觀察大自然有邊啲需要，適量地參與其中，但唔代表人類想點就點。 水口濕地喺50年前仍有常耕種米時，估計有好豐富嘅野生動物資源。農地荒廢後，上游嘅水隨着地表高低周圍流開，不再集中，有啲大型蜻蜓就唔來了。觀鳥會來到開田、起泥壆後，我哋將一條直路嘅泥堆向兩旁，於是凹落去嘅位變成水道，後來就見多咗大型蜻蜓嚟巡邏、產卵。另一個例子係濕地嘅樹木。從保育管理角度，濕地環境生態比較豐富，面積愈大愈好，但附近嘅樹木會生長傳播、入侵並改變濕地生態。雖然斬樹係可採取嘅手段，但我哋做過調查，發現唔係全部樹都可以輕言斬去，尤其有幾棵樹係牛背鷺特別鍾意停留，保留反而更合適。這正正是生境管理中調適性管理（Adaptive Management）的意思，唔可以只跟計劃，要睇住實際環境改變，好有趣。

觀鳥會「山海之間─水口自然保育管理計劃」由2021年底展開，向村民租地，復耕米田。當初計劃用挖泥機開田，預計兩個月內完成。但我哋做過調查，發現使用大型機器太影響原有濕地。我哋唔想復耕過程會破壞當地生態物種嘅居所，於是向好多農業專家取經，最後決定全人手開田。在香港，從頭開墾水田嘅例子唔多，農夫要識得計算水位，控制田與田之間進出嘅水流。之前諗咗好多方案都唔啱用，到𠵱家邊做邊修正，但我完全無後悔以全人手開田。 2023年我哋簡直活喺地獄之中！原定要喺2024年底限期前開墾5,000平方米農地，但改用人手要花更多時間。根據老一輩農夫經驗，需要趕喺立秋前插秧，我哋見進度係趕到喎，於是選定一個方便運送物資、有較好水土嘅正中位置開田。三個觀鳥會職員加一個農夫，四個人喺2023年6月正式開田。我哋首先起好泥壆，即農田嘅框框，然後喺框框範圍裏，鏟泥、反轉、鏟泥、反轉，逐步將原來嘅雜草荒地變為可耕作農地。我哋望住期限一直做，2023年8月8日立秋，終於開墾咗1,000平方米田地，呢個日子我一世記得。 我哋圍內會自嘲為「觀鳥會水口乞丐三人組」，成日爛身爛勢，又講地獄笑話：「你今日中咗幾多次暑？」「三次啊。」「咦，噚日四次喎！（有進步）」。村民見我哋辛苦，周不時請我哋飲嘢，甚至成卷紙巾送畀我哋。村長仲講笑咁話：「你睇人哋入村（工作）會化妝、Gel 甲（美甲），你哋都Gel甲⋯⋯啲泥嘛！」見村民接受我哋，我哋好開心，苦中作樂啦！ 剛好嗰段時間我婚前減肥，喺水口「Gym Room」（健身室）開田，順利減咗20公斤。米田後來迎來兩場黑雨同十號風球，等到11月收成一刻，我真係咇咗滴男兒淚出嚟。收割咗50公斤米，脫穀殼後剩25公斤，碾米後剩16公斤。記得有參與計劃嘅村民話過：「畀我哋每人分返一兩斤就好啦。」我心諗：「大鑊，唔夠分。」最後每人派一袋仔米，夠煮一餐，當係心意啦。村民見到「乞丐三人組」有實在成果後，更加多咗份信任。

回想開初我哋覓地耕田，帶住一份水口農地查冊名單，靠問村民阿Mink（陳鳳明）、村長（陳玉基）、鳳凰士多榮老闆（陳就榮）同華哥（陳新華）等，逐戶聯絡村民、傾租約，村民亦會同我哋分享兒時回憶。Mink話以前由佢屋企望向馬路對面就係一片金黃米田，再遙望就係海灘；池婆（池娣）會數得出水口種過嘅稻米品種，有啲更已經失傳。村民又指出舊時田地嘅位置，叫我哋搵吓以前啲水窿、排水口。 入村工作，我會當村民係朋友。例如有條水溪堵塞了，我會嘗試聯絡渠務署，能力做到嘅話就盡量幫手，村民亦會幫返你。有一晚同事做青蛙生態調查，遇上大雨，村民見到就借件雨褸畀佢。喺保育管理協議項目（Conservation Management Agreement Project）中，村民嘅支持係最重要嘅因素，佢哋絕對有權利參與或退出計劃。我哋想長遠做落去嘅話，就要攞個心出嚟溝通，畀佢哋知道我哋做緊乜，每日建立關係，亦要做到真正成績出嚟。我哋定期同村民開會，種米後影相分享，又邀請大家一齊收成。嗰次十號風球吹起咗部分防雀網，近百隻文鳥經空隙，飛咗入網裏面。我即刻託同事放走佢哋，唔想穀粒被食晒。我哋要有產量向村民交代㗎！ 簡單一句「保育水口生態」，背後包含村民同遊客渴望嘅景色、農夫期待有好嘅收成、觀鳥會同生態人樂見嘅生物多樣性，甚至野生動物都有所需要。我哋做保育管理協議項目，就係要連結多方持份者，加上大嶼山保育基金嘅支持，向着啱嘅方向去做。