蘇隽彥（Kelvin So）
1994年出生，現時任職世界自然基金會香港分會海洋保育經理。自2018年起，他參與水口村環境保育工作，碩士論文也以水口掘蜆活動為研究題材，更找來網絡紅人合作拍攝影片，以幽默方式宣傳和教育公眾使用蜆類保育尺。Kelvin形容自己性格外向，「發掘水口」、「邂逅水口」和「凝聚水口」三期計劃的名稱，就像他與村民慢慢熟絡的過程。他推動以社區為本的環境保育工作，着重村民參與，也關顧他們生活需要。
撰文／張凱琳｜攝影／陳浩倫、張凱琳｜編輯／王家文
我於2018年8月加入世界自然基金會香港分會（WWF），同年10月WWF開展「發掘水口」計劃，了解掘蜆活動對生態影響。如果要了解水口灣嘅環境承受力，首要知道泥灘上有幾多蜆、遊人會掘走幾多。當時我才發現，本地很多研究都關於蜆類嘅型態、基因分析和群落分布，卻從來無人做「掘蜆嘅人掘乜蜆」。 嗰時我正準備碩士論文，特別有興趣研究人嘅環境行為表現，因為自我認知同實際行為表現可能有落差，例如一個人自認環保，但唔代表佢一定係環保。掘蜆活動很取決於個人行為取向，例如遊人掘蜆後，帶唔帶走啲蜆？遊人會喺灘上逗留幾耐？於是我決定「一雞幾味」，既開展水口生態調查工作，同時以掘蜆活動為題進行論文研究。 生態基線調查歷時一年，2018至2019年每個星期六日我都到水口灣，並招募一班公民科學家協助，共記錄了一萬多隻蜆，推算出水口灣嘅蜆類物種數量和分布，發現沙白和三角蜆的平均尺寸分別是五厘米和三厘米。理論上，蜆類成長到某個體型尺寸，繁殖力會降低。如果細過平均尺寸嘅蜆能夠留喺泥灘，繼續成長繁殖，有助穩定蜆類數量。 至於碩士研究，我以問卷調查訪問掘蜆人士對自然生態嘅保育態度，自我評估掘走嘅蜆算是大隻定細隻，並記錄受訪者帶走蜆嘅數量、尺寸等實際掘蜆行為，比對平均尺寸標準，評估佢哋有無留低細蜆，實際行為是否符合環保。2019年5月我碩士畢業，論文於2021年刊登。結果發現，遊人環保意識高但實際上不一定做到環保行為，因為單靠主觀認知，不清楚幾多尺寸嘅蜆先係「小」。這就證明WWF設計嘅蜆類保育尺有價值 ，能協助遊人辨別蜆隻大小。另外，我亦收集幾個村民嘅數據，佢哋使用翅口鐮掘蜆時，只會篤到大蜆才有響聲，掘出嘅蜆至少有五六厘米，證明翅口鐮係好環保嘅篩選工具。 我希望水口灣有管理措施，掘蜆活動受規管，唔會過度採集，具體做法可以再討論。外國有可持續採集（sustainable harvesting）措施，例如加拿大推出蜆尺、蟹尺，於國家公園亦設閘口，遊人出閘時，帶走嘅蜆蟹體型不可過小，並要秤重記錄，違規或過度採集會被罰款。整個環境管理需要法例、設備等多方面配合。
蜆尺喺香港係新教育方式，用法簡單，若蜆隻能穿過尺上嘅窿就不宜帶走 。我想令更多香港人認識蜆尺，宣傳一定要得意、入屋，始終環境保育本來就係小眾關注議題。當時無乜環保團體會搵網上KOL（Key Opinion Leader，關鍵意見領袖）合作，我哋向公司解釋KOL係乜、Views（瀏覽）數量等預期宣傳效果，最後搵到東方昇（藝人王嘉偉）拍片，內容要唔沉悶、夠好笑，畀我短短講幾句介紹蜆尺用途、推廣生態保育就足夠。 這次是我喺WWF拍攝嘅第一條片，亦最深刻。影片中，橫壟士多娟姐受訪時話，蜆類對海洋生態嘅作用係「開邊蒸，仲有炒蒜蓉」，無預計佢會咁講，勁搞笑。影片喺Facebook平台至今有70萬Views，以環保議題片來講，係好難超越嘅成績。𠵱家我落灘工作，仲有遊人認得我。嗰次合作證明方法有效，之後公司有繼續搵KOL合作，我幾自豪做到呢件事。
喺水口進行嘅三期計劃，「發掘水口」（2018-2020）、「邂逅水口」（2020-2021）和「凝聚水口」（2022-2023），名稱就好似我同村民逐漸熟絡嘅關係。「邂逅」一詞，好比兩個人剛接觸，未係好了解和信任對方。計劃開初，未有好多村民支持我哋喺鄉公所外牆畫壁畫，於是我哋改畫在鳳凰士多外牆。後來村中小朋友想一齊參與，就畀佢哋喺蜆殼上塗顏色，再黏貼在外牆，村民見到壁畫後都覺得幾靚。 第三期水口計劃以「凝聚」命名，畫牆成為重點。我哋籌辦兩場壁畫設計共創工作坊，收集村民嘅集體回憶和對水口未來期盼，有60多名村民參與。你見斜路旁嘅壁畫，有一個唔着衫、只穿短褲嘅人，其實係驛站士多老闆池生（池明輝）。嗰時我經常同佢飲啤酒，佢煮沙白米線好好食，湯底有肉碎、沙白肉粒，更用蝦醬調味。我同村民已經不止於工作關係，由2019年開始，除了疫情期間，每年大年初二開年我都入水口拜年，又帶爸媽同女朋友入嚟玩，好多村民都見過晒面。 同時，因為水口計劃持續進行，我哋入村逗留時間愈來愈多，一個月至少三四日，所以租咗個地方辦公。間屋仔得兩層，但位置就腳方便，而且租屋後，才覺得真正成為社區一分子，村民遇見我哋都會話：「你就係嗰間屋仔（嘅人）」。於是我哋索性將辦公室門牌叫「嗰間屋仔」，再加上WWF熊貓圖案標誌，幾有玩味。
我哋喺水口推行嘅保育計劃，以社區為本（community-based），寫計劃書前就邀請村民參與，又共同制定掘蜆守則，並收集村民對壁畫設計圖嘅意見。修改過程中有來有往，內容亦有彈性。例如我哋為水口添置兩部AED機（自動心臟除顫器），但咁做跟海洋保育、社區參與有乜關係呢？正因為關顧村民需要。曾經有個伯伯喺鳳凰士多突然暈倒，失去知覺，但附近無AED機，村民又唔識心肺復甦法，雖然救護車趕到，但最後伯伯都過身了。我提議買兩部機，因為預計會愈來愈多機構入村工作，村裏又多老人家。後來我哋更舉辦一場急救工作坊，喺鄉公所教村民使用AED機同基本急救知識。其中榮老闆（鳳凰士多老闆）嘅參與好重要，因為佢常常留喺村。 我心目中最理想係由村民管理水口灣，地方係屬於村民，係村民嘅屋企。村民親身呼籲遊客掘少啲蜆，比NGO（非政府組織）職員來講更具說服力。正如最初同四間士多老闆合作，我哋喺士多派蜆尺、掛「掘蜆守則」橫額。當老闆聽到我哋向遊人講掘蜆守則，聽多幾次佢哋都會識講。資助計劃會有完結一日，所以我哋更要同村民合作管理環境，日後村民才有能力接手水口保育。
