徐德娣（徐婆）
徐德娣（徐婆）於1926年出生。19歲時從石壁大村嫁來水口村，但丈夫早逝，她獨力養育三個子女。徐婆愛唱山歌，憶記生活況味。耕田、掘沙白、打蠔、釣魚等，她樣樣皆精，後來亦參與修建石壁水塘的引水道，村民都十分欣賞她的毅力和樂觀性格。
撰文／張凱琳｜攝影／黃維昌｜編輯／王家文
【圍頭話】單腳畫眉難過山 單手獨拳難搵食手板做存錢 間頭做路行食粥打花心經亂 無乜閑心織幼麻 〖白話翻譯〗缺了一隻腳的畫眉很難飛過高山只有一隻手的人很難維持生計靠雙手努力賺錢 靠雙肩擺動前行吃不飽的日子心亂如麻 哪有閒情去織麻布呢—— 一首水口山歌
我喺石壁大村出世，19歲嫁過來水口村就一直住喺度。先生細我一年，叫池坤發。佢本姓陳，後來過繼池家。我哋未出世時兩頭親家已經決定婚約。我未嫁時曾經離遠望佢，唔高大但好靚仔。和平後1945年10月22日我哋結婚，當日我着大紅袍，坐大紅花轎，好多人來祝賀我哋。 結婚第二年家婆過身，家公好惡死，成日鬧到我喊，可能因為我先生唔係佢親生。先生話家公都老啦，叫我忍吓、由得佢。我29 歲嗰年，先生辛勞過度，肺癆病死，留低我同三個仔女，大仔、大女同遺腹女，我傷心都無法子。外嫁女唔會返娘家㗎，有幾伙人家叫我改嫁去䃟石灣、十塱，但係咁樣我仔女嘅命就賤過狗，點解我要咁笨呀？嗰時先生多田地，有幾斗田，能夠撒12 幾斤穀種1，咪自己一個慢慢捱。 「食嘢無定餐，揸船無定灣。」每朝六點出太陽，我就起身煮定一罉飯，七點食飽去種田。中午返屋企食飯，用凍滾水加黃片糖送冷飯，仔女都跟住食。有時加蝦醬、鹹蝦，有啲係買返來或者自己整。然後再落田，太陽落山後再煮晚餐。當時又要耕田又要釣魚，無閒！捱苦捱到隻手都皺晒。
耕田就有米飯食啊！有時想換錢買餸買工具，我就搖櫓去長洲賣穀，一擔穀賣到20至30蚊2。我又會養雞餵豬、打蠔仔、打池口3、捉狗爪螺，唔怕無餸食！我養嘅雞好快大，每朝倒啲雞料畀雞仔，佢哋一日食到黑，三個月頭就幾斤重。我以前有隻艇，會揸去釣魚。因為每日水流都唔同，一個月只得幾日可以出海。我最叻釣池口，將鱭魚切成一粒一粒做餌，扔落石窿撩兩撩，一日最多釣到十斤。要曬鹹魚就攞石狗公、石䱛、石斑仔。打蠔仔我都好熟手。蠔殼黐住啲大石，我用蠔琢鑿開佢，再擘開，然後鏟出來。多年來我買吓買吓，儲起十幾把蠔琢4。有首山歌仔唱：「打蠔阿妹面向西，不如嫁拗魚弟」，咸濕歌嚟嘻！ 農曆初一、十五前後日子，日頭水退，我朝早四、五點就出去水口灣掘翅口。嗰時我好好眼力，好容易就搵到「翅口眼」，嗰個位嘅沙比較腍。翅口鐮插落沙，撞到翅口會有「咯咯聲」，然後用鐮鉤撩上來。有咩技巧？要睇得清楚，手又要密密篤。翅口鐮係我睇住其他人學，再自己整。我落去水口灣會帶兩個竹籮，掘到翅口就放入籮，最後用翅口鐮掛住「前一籮、後一籮」，擔住兩籮翅口返屋企，加薑蔥一齊煮，有時煮瓜或曬乾存起佢。我自己唔太鍾意食翅口，畀仔女食多，亦會拎去鳳凰士多，賣15蚊斤。2018年我92歲，仲會去掘翅口。嗰時有遊客問我點搵翅口，我就指個翅口眼叫佢掘，掘到幾大隻出來！𠵱家太多人來掘蜆，踩爛晒沙地，睇唔到翅口眼，惟有「盲理篤」，求其嚟囉！ 1960年政府起石壁水塘時搵水口村民做泥工。我有份造水渠路5，造到去長沙，由最初賺三個半一日，後來加到20幾30蚊一日，三年就儲到12,000 蚊，夠錢可以（畀一般人）娶老婆囉！做泥工梗係好搵啲，於是我無再耕田。但慘在買唔到新鮮餸，去大澳要行三個鐘，來回就六個鐘，唔得㗎，我咪餐餐鹹蛋臘腸腐乳當餸菜。當時仔女出晒城工作，嗰啲辛苦，講唔到畀人聽。泥工做唔夠十年，我55歲就退休啦。
阿孫1981年出世，我搬去青衣嘅大仔屋企湊孫，兩年後又返水口住，同阿底（池娣6）繼續釣魚、掘翅口、種瓜種菜，一直到80 幾歲。我最鍾意食蘿蔔！我記性好好㗎，𠵱家90幾歲仲記得以前嘅事。外孫阿昌（黃維昌）又幫我影過好多相，影我整茶粿，有雞屎藤、艾草同苧麻葉三種味道。 咁多年來我一直掛住先生，佢喺九龍山醫院7過身，嗰度太遠啦，我見唔到佢最後一面。之但係掛住又有咩用呢？女人係穀種命，嫁到去邊就喺邊度生根囉。
本文相片是黃維昌於2009至2012年在理工大學修讀美術及設計教育學士學位課程期間之拍攝紀錄。