池娣（池樹底、池婆）
池婆原名池樹底，後來改名為池娣。她在1928年出生，是水口池氏第九代村民。她年輕時以務農為生，也曾在長洲打住家工。22歲時嫁給水口村民陳壽，養育了九個子女。先生陳壽則由1965至1995年擔任水口村村長。池婆形容自己十分八卦，自小到處跟村民吟唱山歌，也愛與徐婆一起唱。
撰文／張凱琳｜攝影／朱煒傑｜編輯／王家文
我本名池樹底，後來攞身份證時職員改咗我個名做池娣。我喺水口出世，兄弟姊妹之中排第五，係孻女。阿爸係水口人，佢早死，我對佢無印象。阿媽係貝澳十塱客家人。我鄉下就係大嶼山水口村，一直喺太公留落來嘅田地上生活。 以前每年種兩茬米。頭茬米喺3月種禾，7月收割；尾茬米8月種禾，11月收割。當時水口村家家都有黃牛耕田。天光我就起身掌牛，拉牛去食草，再拉去畀大人使牛犁田、耙田。牛行唔到埋去田嘅四角，就由我來鋤鬆泥土。中午我帶飯畀阿哥、阿媽，早午都食番薯、芋頭。我哋無錢買肥料，雜草割落來就燒成草木灰，旱廁旁邊放草木灰冚着屎尿，之後就堆成肥料。 我同阿哥家姐會通山跑，摘稔仔（山稔）、校仔（油甘子）等野果，夜晚用禾稈草掟來掟去，玩到攰就瞓覺。我又跟阿媽去執翅口、蠔仔。輕擎工夫由女人做，例如落田、掘翅口；粗重工夫就男人做，例如擔擔抬抬、出海釣魚同攞海膽。 鹹苦（艱苦）事情太多喇。阿媽喺我12歲時死，我有個喺金山（美國三藩市）嘅伯伯，寄錢畀阿叔照顧我，於是我喺長洲東莞學校1讀咗三個月書。但阿嫂好刻薄，使我去擔水又賣我去做妹仔。嗰家人嫌棄我生得細粒無氣力耕田，我惟有一個人住喺爸媽留低嘅舊屋。阿嫂每個禮拜只會畀我三個牛奶嘜咁多嘅米，我靠自己摘海邊嘅露兜果核填肚。後來朋友介紹我去幫長洲英文書館2張經柏校長打住家工。日本仔打到來時，最有印象係日本仔要我幫手曬乾一大批十蚊港紙，銀紙多到鋪滿成間屋。打工嗰四年來，校長對我好好，人工20蚊一個月，比上不足，比下有餘啦！
當時，我堂細佬同阿壽（陳壽）喺西營盤住，阿壽喺薄扶林墳場做執骨3，佢哋放假就來長洲探我。細時，阿壽住水口村上麓（上村），我住下麓（下村），不過大人唔畀男女仔一齊玩。我認得阿壽係同村人，我知道佢好唔好仔、慳唔慳家。佢都係無父無母，無複雜關係。佢又有田有地，識耕田就得，飽我唔死但都餓我唔死啦！以前村民甚少跟同村人結婚，因為怕太近親，下一代生長會唔正常，我哋結婚前有謹慎確認過血緣關係。真正認識阿壽前，有個住望東灣嘅男仔經常來搵我，又蠢又冤氣。我話：「你快啲行開啦，成日睇住我洗衫做乜？」佢又買戲飛請我去長洲戲院4睇戲，結果我送咗張飛畀其他人。 我22歲時同阿壽結婚，兩年後生大女，之後我哋返水口耕田。我哋有六斗種5田地，但無積蓄買牛，惟有向住貝澳嘅姑奶借牛。每茬米收成有百幾斤，尾茬米靚啲，留畀自己食。自己種嘅米細粒啲，好軟滑又香。後期我哋種較值錢嘅黑糯米，有人會浸黑米酒，飲來補身。而頭造米就連穀殼拿去賣，我要湊仔女唔得閒，梗係交畀好力啲嗰個！阿壽擔去梅窩、大澳賣米換錢，再買青菜、菜脯，同鹹魚、蝦米等海味返屋企。
政府1955年起嶼南路（嶼南道，舊稱大嶼山公路），我做泥工，由長沙消防局開始，分段造到石壁水塘，每日賺廿幾蚊。嗰段時期，我同大妗（徐德娣6）係「最佳拍檔」，一齊撈石屎砂漿，我鏟砂上斗，佢負責撈成石屎。我哋又一齊去石壁水塘種樹。六十年代政府起石壁水塘，水務局請阿壽做工人打理引水道，人工300幾蚊一個月，我哋才真正有收入、積蓄，但自此無再種米，只種啲菜同番薯。鄉下人田地係屬於自己嘅，唔耕開就會生晒雜草，想再耕嗰陣就辛苦喇！七十年代，阿壽賣咗部分田地換錢，加上積蓄就夠錢起新屋。我哋請來村民，男工30蚊一日，女工20蚊一日。有鬭木佬負責起屋，而女工從河口擔來淡水沙，又一齊砌磚。村民之間好合作，「你幫我、我幫你」咁樣。第日到你起屋，我一樣幫返你。 阿壽真係好「能械」（能幹），勤力耕田、識鬭木，同人又夾得好。村民都簽名支持佢做村長。人夾人緣，賊劫火灰船。由1965年至1995年，佢做咗30年村長。例如有人想起丁屋，阿壽會幫手寫信、簽名，仲做埋跑腿送信去中環嘅政府部門。我覺得阿壽對水口村最大貢獻，係向政府爭取興建水口鄉公所、下橫壟足球場同陳氏祠堂。佢同水口、梅窩村民、理民府官員、鄉事委員會委員嘅關係都好好，人人稱呼佢做「壽哥」。至於錫唔錫我，就一時時啦，比上不足，比下有餘啦！ 我有九條化骨龍，三個仔、六個女。大女喺長洲十字會醫院7出世，第二至四個喺水口屋企，第五個喺梅窩一間村屋，搵宋姑娘幫忙接生，另外三個喺長沙醫院8。最架勢係生孻女阿明（陳鳳明9），當時我胎動，但長沙醫院唔接收我，因為生第九胎太危險喇。姑娘打電話叫飛翼船（快船）載我去西環贊育醫院生阿明。 我想仔女學識耕田幫我手，但一世耕田無出頭。水口學校喺1954年開校，我送全部仔女去讀書。之後佢哋出城打工、結婚生仔，有時我去探佢哋。鄉下婆唔識欣賞出面邊度好，又無地方好行。不過，後生有自己主意，老人家唔好理佢哋點過環境（生活），最緊要佢哋識拜神，向祖先有交代。有例不可減，無例不可添。
我自細就唱山歌，耕田做得辛苦就噏吓、順吓條氣，我最鍾意唱雀名歌。有啲山歌係同男仔打情罵俏，撩吓對方或者鬧人。「檯頭有碗狗屎水，一人呷啖就行開10！」以前唔惡啲、唔窒吓人，會被人恰㗎！婚嫁喜慶場合，例如男丁結婚、做圓月，村民都會唱歌。家裏有男丁結婚，飲宴當晚要「升字」。成班男人打鑼打鼓，一邊唱「升字歌」，一邊將新郎嘅大字掛上屋企東邊嘅牆，好好興趣（興致）㗎。而做圓月係指結婚滿一個月，男家邀請外家去屋企唱山歌。佢哋知道邊個人識唱，就會阿趦阿趄，留人食飯過夜同唱山歌。外家嘅阿嫂阿嬸一排企起清唱，男人就喺下面搭嘴對唱，而唔識唱嘅人，被唱罵兩句就歪歪嘴行出去。（全部係）古老十八代（嘅事）！ 我幾貪靚㗎，喺長洲打工賺到錢就造幾套（絲）綢衫，十幾蚊一套衫褲，有黑色同淺黃色。我着得新淨、光鮮啲，就跟親戚去唱，最常去䃟頭村、白芒村。我細個時八通街㗎，哈哈，捐窿捐罅去聽老一輩人唱歌。我又專心學，學識咗就鍾意唱，連隔離村人都話「好歡迎阿底來唱歌」，俾人讚我就開心！梅窩、塘福都有山歌，而大妗更識唱石壁山歌。早幾年佢經常來我屋企，同我唱吓山歌、打牙骹。「大妗日日來，唔來心唔開。」呢首歌係我作㗎！
