陳鳳明 | 人物 | 水口手記 Shui Hau Diary Shui Hau Diary

陳鳳明（Mink）

陳鳳明（Mink）是水口村陳氏家族第十代原居民。她在水口出生、成長，直到中學畢業後才搬到市區繼續升學及工作。她曾任職社工，也是註冊園藝治療師，2017年回到水口村居住後，一直以不同形式記錄家鄉特色，包括拍攝風景和抄錄山歌。熱愛耕作和養蜂的她，經常將自家種植的農作物與村民分享。

撰文／張凱琳｜攝影／朱煒傑｜編輯／王家文

中學畢業後我搬到市區居住同工作，任職復康院舍註冊社工，已有十幾廿年，一直好嚮往喺45歲前退休返水口村。當時我諗，已經花咗好長時間服務其他人，卻好少照顧親人。阿爸（陳壽）晚年經常出入醫院，我去照顧佢、陪佢傾偈，直到佢2015年過身。當時媽媽（池娣）身體幾好，我亦有較多空閒時間，於是我去學習新事物——園藝治療。我喺水口有地方適合做園藝種植，亦有兒時幫爸媽種菜嘅經驗，而且園藝治療同社工甚有關係，人們藉着接觸大自然，改善生活質素同身心健康。我成為註冊園藝治療師後，間中會到社福機構同院舍帶領園藝治療小組。有參加者係精神復康人士，住喺中途宿舍，較常有擔憂同焦慮。我會畀鮮花佢哋捽吓、聞吓，話畀佢哋知道鮮花係我親手種植，再即場沖泡花茶畀佢哋品嚐，大家就會建立多幾分信任。 2017年尾我返到水口居住，大部分時間都會陪伴媽媽，或落田種菜，實現咗我嘅退休計劃，做個「返鄉中年」！

我家族有個果園喺橫壟，位於水口村東面，距離十分鐘步程。入面全部果樹由阿爸一手一腳種落，生長至今已有四、五十年。返到水口後，我同朋友一齊整理果園，修剪果樹、翻土堆肥，想養靚啲泥土，騰出地方種植。2018年，我哋偶然發現被帆布冚住嘅工具堆中，原來有一竇「自來蜂」，而且已起咗幾張蜜脾¹。我相信蜜蜂鍾意呢個地方，因為水口有豐富花蜜來源。蜜蜂喺夏天可採集果園嘅荔枝樹花蜜，路邊同草叢都有白花鬼針草同埋馬纓丹等開花植物，冬天則可採集後山嘅鴨腳木花蜜。本來我哋已買定工具，打算自學養蜂，呢次「偶遇」就順理成章，將自來蜂放入蜂箱，開始養蜂之路。我對養蜂嘅好感，早喺細個時已培養起來。我會同阿哥家姐跟隨阿爸去野外捉蜂。當阿爸嗌：「噴煙！」我哋就遞炷香畀佢；當蜂群快要飛走，阿爸嗌：「撒沙！」我哋就向蜂群撒泥沙，好玩！但到底點樣捉？當時我未試過。阿爸嘅養蜂方法好自然，無刻意鑽研技巧。佢自製蜂箱，先釘裝一個木框，木框內拉上鐵線，畀蜜蜂自行起蠟，即用來儲蜜嘅六角形巢房，再喺蜂箱側邊𠝹出一條坑，畀蜜蜂出入。幾個蜂箱放喺屋企各處，地下門口一個，樓上騎樓兩旁各一個。阿爸捉蜂王入箱後，唔會再打攪啲蜜蜂。蜜蜂喺夏天過得幾艱難，因為大雨會打甩花粉同花瓣。當蜜蜂唔夠花蜜食，就會離巢。阿爸會由得佢哋遷走，等到喺野外遇上新蜂群，才再捉入箱。𠵱家我養蜂有好多技巧，例如應對天氣狀態使用唔同結構嘅蜂箱巢門，又會買定巢礎，蜂群就按住上面六角形嘅巢房起蜜脾，唔使從頭開始起蠟。到夏天我哋會餵飼蜜蜂，將花粉、蜜糖同白糖混成糖漿，再擳喺木框頂，一排排蜜蜂就密密食，好得意。至於捉蜂，我𠵱家對蜂聲已經好敏銳，半空中嘅蜂群會發出哄哄聲，比嗡嗡聲更大聲，離遠十零廿呎都聽到。有超過三、四千隻蜜蜂嘅蜂群就最適合捉來養。我哋向蜂群潑水或撒沙，佢哋會飛到附近樹木結成蜂團暫避。我試過赤手撥開蜂團，搵出蜂王放入盒仔，然後掛喺蜂袋入面，再推少部分蜜蜂入去，其他蜜蜂就自然跟上，好好玩㗎！因蜂群處於「走佬」心態，除非整傷佢哋，否則唔會刻意攻擊人。我哋養蜂兩年後，開始有蜂蜜收成，咁啱遇上土地教育基金開展「梅窩 Farm to Table 農業社區」計劃，邀請我哋到梅窩農墟擺檔賣蜂蜜。我哋創立嘅品牌「嶼嗡」，名字除咗象徵大嶼山嘅小蜜蜂，亦包含我哋嘅付出，希望將呢份努力具體展示出來，畀多啲人認識、品嚐。第一批收成嘅蜂蜜約有30樽（約240g），短短兩日就賣清光啦！

復修後的禾寮存放着昔日村民務農和掘蜆的工具。

阿爸養蜂、阿媽種菜種米，做法係來自過往經驗累積，佢哋未必識得一啲知識。例如養蜂人會攞成熟蜂蜜，又稱「封蓋蜜」²，但阿爸唔識，有時直接攞未成熟嘅蜂蜜，結果喺室溫下繼續發酵滲氣。我拎過一枝發緊酵嘅蜂蜜，以為變質唔食得。好彩我去歐洲旅行時飲過蜂蜜酒³，先至知道嗰枝發酵中嘅蜂蜜仲可以飲用。返到香港後，我即刻溝咗杯蜂蜜酒梳打水，正到暈！現時，我既會採用爸媽燒草木灰⁴等傳統農耕方法，又會上網學習新知識。例如春天時海藻隨海風漂流到水口灘，我會收集來浸泡成液體肥料。2023年，香港觀鳥會喺水口村復耕，我又收集稻米穀殼製成穀炭，喺冬天時用作肥料種菜，我覺得嗰一輪菜特別好食！我嘅退休生活比想像中更豐富。我喺梅窩農墟認識咗擅長煮食嘅大澳村民，佢善用我嘅農產品，整成芳香萬壽菊雪花酥和黃皮酥餅等美食。水口有泥灘、農田，有我熟悉嘅社區，每個角落我都會搵到樂趣。例如去泥灘掘翅口（沙白），大約兩、三個鐘，有時同家姐去，係我哋兩姊妹傾偈時間；有時我一個人去，就自己排解吓煩躁或放空。我覺得掘蜆好「禪」，好似靜觀。原來專注做一件事，先可以好好整理思緒。

近年我覺得水口文化有啲沒落，比如農曆正月十九日「扒天姬」整雜糍嘅傳統⁵，已無乜人會做。以往我無將傳承水口歷史視為人生必要嘅工作。我記錄媽媽唱山歌，只想畀屋企人嘅小朋友知道，嫲嫲好叻識唱歌。到2017年，城市日記來到水口拍攝紀錄片《水口婆婆的山歌》，並舉辦公開放映會，我先發現原來水口山歌獨特又珍貴，坊間好多人有興趣了解。我愈諗愈覺得：「如果我唔做，有邊個嚟做呢？」 2024年，中大建築學院復修咗我哋間禾寮後⁶，我參與籌辦多個工作坊，推廣農耕文化同傳統工藝，正正想畀更多人知道水口歷史文化。而每逢「扒天姬」整雜糍、清明節整茶粿，我就整多幾份，分畀村入面嘅老人家。第日水口村仲有無人延續傳統習俗，我控制唔到，但起碼喺我做得到嘅時候，就努力做多少少。

蜜脾，又稱巢脾，是由蜜蜂工蜂分泌蜂蠟築成的蜂巢，其外形像脾臟，由大量六角形巢房組成，用來儲存蜂蜜和花粉，或作為育房飼養幼蜂。（資料來源：蜜蜂主題館（2024年10月28日）。蜜蜂的生活。取自農業知識入口網：https://kmweb.moa.gov.tw/subject/subject.php?id=12574）
封蓋蜜是成熟的天然蜂蜜。蜜蜂將採集到的花蜜吐入巢房，經過發酵釀造與搧風，使水分逐漸蒸發。當蜂蜜變得濃稠，其酵素和酵母菌便停止發酵，蜜蜂就會用蜂蠟封住巢房，完成儲糧。（資料來源：張世揚（1994）。蜂蜜的採收與保鮮。蠶蜂業專訊革新第十號。取自農業部苗栗區農業改良場網站：https://www.mdares.gov.tw/ws.php?id=1002）
蜂蜜酒的傳統做法是將蜂蜜加水稀釋後，添加酵母進行釀造。Mink提及父親那枝尚未成熟的蜂蜜，恰好是水分較多，以及含有活躍的天然酵母菌，會自行使蜜糖發酵，產生二氧化碳和酒精。
草木灰是由乾燥雜草、樹葉和樹枝燃燒成的灰，含有豐富的鉀元素，可作堆肥使用。
每年農曆正月十九日為「扒天姬」，亦稱「扒天機」。昔日水口村民按照習俗，以番薯、糯米粉和五香粉製成「雜糍」，作為祭祀食品。
禾寮由陳鳳明和姊姊擁有，昔日用來存放稻禾和擺放農具。