陳雅莉（Cecily）
陳雅莉（Cecily）於1989年出世，是陳就榮的長女，也是水口村陳氏家族第十代原居民。九十年代時，由於家中物質寬裕，她在童年擁有各式各樣的玩具。近年她十分珍惜家族資源，又參與村中大小事務，更結識不少新村民。現時，她是49號屋的負責人，希望保留這間三級歷史建築，讓更多香港人了解水口的故事。
撰文／張凱琳｜攝影／朱煒傑｜編輯／王家文
我喺港島那打素醫院1出世。嗰時爸爸（陳就榮2）經營渡假屋同鳳凰士多，媽媽打理家頭細務，照顧我同妹妹。八、九十年代，香港人鍾意托住大部收音機周圍玩，來到水口村租渡假屋，至少玩兩日一夜，所以渡假屋生意唔錯；加上爸爸同幾個伯伯起丁屋，權伯伯（陳就權3）又喺水口設塑膠廠，當時家族日子幾風光。我由細到大都「十指不沾陽春水」，而且屋企物質充裕，生活過得幾幸福。 我喺梅窩讀幼稚園，六歲入讀灣仔聖公會聖雅各小學下午班。二年級時，妹妹升讀同一學校，媽媽教我帶妹妹坐巴士返學。自此，媽媽同我哋坐船到中環後，就去上環返兼職，我就拖住妹妹返學。每日交通時間漫長，放學後我會把握時間喺船上做功課。平日我哋坐普通位，會自備膠凳仔做功課。媽媽有時會買豪華位船飛，我哋就有得食碗公仔麵，仲可以喺檯上舒舒服服做功課。學校設長短週，隔個星期六要返上晝班。我哋朝早趕搭頭班船，中午阿爸揸貨車接我哋放學。當時青馬大橋未起好，貨車可以搭船過海㗎。 由於返學路途頻撲，二年級下學期時，我跟媽媽同阿妹搬去港島同舅父一齊住，但一年後我健康變差，係咁反覆發燒，仲入院留醫一個月，於是搬返水口，住到𠵱家。
九十年代，我喺村入面有好多嘢玩，同十幾個年紀差唔多嘅小朋友，跑勻成條村玩「伏匿匿」（捉迷藏），又喺石乒乓波檯玩「鬼掹腳」4。當時閘門對落係一片草地，樹下面有成群雞，滿地雞屎。我哋照樣趴喺地下碌，又畀啲雞追住啄，玩到損手爛腳。 權伯伯喺水口設塑膠廠，生產降落傘兵玩具。成品要經人手加工，綁上傘網。所以鳳凰士多對出空地成日出現一座「玩具山」，有餐檯咁高。爸媽同伯伯幾個大人坐喺凳仔，圍住「玩具山」做加工。我同阿妹仲係細，就坐喺「山上」，見邊個做得七七八八，就推啲玩具過去補上。 我童年時代物質算係富裕。屋企人會去梅窩租錄影帶，我又會睇《閃電傳真機》5，或者去村民屋企玩紅白機6。媽媽朋友嘅家境都幾好，每次聚會我都收到好多禮物，有芭比公仔、Lego（樂高積木）、Puzzle（拼圖），而且Gameboy7遊戲機從第一代灰色機身到唔同顏色外殼，包括黃色、銀色、透明、紫色等，我幾乎集齊。 有段時期，鳳凰士多多咗部街機，仲有得玩《街霸》（街頭霸王）遊戲。我五歲就識得攞鎖匙偷偷地打開街機，攞入面兜錢出來，用來入返錢開機玩，朋友都有得一齊玩。新相識嘅朋友聽過我講童年生活，都會覺得驚訝，但嗰陣時我唔覺得特別，亦唔會珍惜。 後來，我喺東涌讀中學，同我一齊長大嘅村民，有啲去外國升學，有啲搬出市區，走吓、走吓，水口得返公公婆婆，無同齡人同我玩。中學畢業後我亦出市區工作，加上同家人關係出現磨擦，就更少參與屋企事務。
近年，我感受到社會面貌轉變好快，有啲文化資產要主動保護先可以留低，我更有意識要負起屋企嘅責任。我回想返細個時原來好幸福，但大個後無好好珍惜。以49號屋為例，唔單只係我哋家族祖屋，更加係大嶼山現存唯一一間用麻石同青磚建成嘅村屋，獲評級為三級歷史建築，無論建材定係造工手藝都好難再搵得返，非常珍貴。呢類屋少一間就少一間，無得返轉頭。但我要成為持份者，先有權決定保留祖屋，而唔係改建村屋發展。所以，𠵱家49 號屋儘量按原貌復修，就係想畀多啲人知道香港以前嘅歷史故事。 我性格變得成熟亦緣於工作經歷。前幾年我因工作需要而走勻全港車房，頻密揸車去偏遠地方，迫使我嘅駕駛技術突飛猛進。我又同阿妹一齊買咗部私家車自用，唔使再用士多嘅貨車。於是，我多咗揸車去從未去過嘅地方，一路聽住音樂，車速快慢自如，畀我真正享受到駕駛樂趣。我發現學習新事物，只要肯面對困難，慢慢就會熟練，然後就可以掌握喺自己手入面，原來係一件好舒服嘅事，唔需要再因為害怕，做起事上來都要就住就住。 所以，𠵱家我會樂於嘗試新事物，例如同男朋友耕田種菜，係我由細到大都未諗過。我哋運送肥料入村，順便分享畀村民一齊種菜。我哋又會沖咖啡，有對夫婦每星期來搵我哋，一來就要三杯咖啡。我認識好多由市區搬入來嘅村民，有啲住咗六到十年，其中有幾個外國人成日喺士多小聚。佢哋性格開朗，熱愛交流同分享旅行見聞。2020年，部分跟我同輩嘅年輕村民開始搬返水口，因為鍾意呢度夠寧靜。佢哋問我幾時搬返來，我話：「無搬過啊！」我感受到，呢度既有我爸爸一輩嘅人脈，我亦喺度建立緊多一個人際網絡。 我想水口村令人感到舒適，村民住得開心。要做到呢件事，好多時要靠自己先行動，其他人見到效果好就會跟隨。例如我整理好士多空間，又借出外牆畀世界自然基金會香港分會（WWF）畫壁畫。近年我亦會主持村務會議，以前由阿爸做，我從旁記錄。當時我見到村民喺同一問題上打轉咗幾年，好傷和氣。後來我提早準備議程，開會時每人一份，令討論過程更有效率。村民之間少咗爭拗，亦係我想達成嘅事。 喺遊客眼中，掘蜆活動係水口一大特色。但近年我發現啲蜆愈來愈細隻，又見到遊客去完泥灘就直接離開，甚至唔知呢度有條村。假如將來水口灣無得掘蜆，難保水口唔會變成「死城」。水口村唔使好出名，但我唔想活動太單一，有多啲掘蜆以外嘅活動，可以減輕泥灘生態負擔，長遠亦能夠令水口變得更好。