撰文／張凱琳｜攝影／朱煒傑｜編輯／王家文
2020年一個颱風吹襲後，我響應一位網友喺社交平台發起嘅淨灘行動，第一次到水口灣清理垃圾。後來我參與籌辦「我的山海日誌」計劃1，於2021至2022年期間，每月淨灘一次，主要選址水口灣，並記錄海洋廢物類別和重量。 計劃招募本港市民參與，也跟學校和企業合作籌辦活動，在香港不同山徑和海岸收集和統計各種廢棄物，透過公民科學方式，建立一個山徑和海洋廢物數據庫，以此作為推動環境教育及環保政策嘅基準，從中知道改善海岸垃圾問題應該從邊度入手。參加者在淨灘過程中，可以了解海洋垃圾同人嘅關係，以及日常生活中有甚麼可以作出改變。例如，膠樽一直是海洋廢物中數量最多，我哋好鼓勵市民從生活習慣做起，源頭減廢，飲少啲樽裝飲品，並做好回收，不要隨便棄掉，送到堆填區。 淨灘活動主要選址水口灣，因為交通便利，參加者在水口村落巴士後，經小徑步行10分鐘即到達泥灘。而且，水口灘嘅垃圾積聚速度好快，我哋義工每個月去清理，每次都有200公斤垃圾，清極都清唔完！ 水口灣一向係香港海洋垃圾黑點2，政府早在2015年就將水口列為其中一個需優先處理海上垃圾地點3。根據地理位置，水口灣屬於內灣，灣口向東。垃圾一旦被海風吹入海灣，就很容易積聚在泥灘。所以每次颱風過後，水口灣係重災區之一。很多人會自發去淨灘，但灘上垃圾問題仍然嚴重。
水口灣沙坪有兩處入口，一個是離水口村十分鐘步程，從橫壟足球場行入去，嗰邊泥灘嘅沙石較粗身，普遍都是膠樽等垃圾，清理過程相對簡單。另一處入口是行經濕地嘅小路，嗰邊灘上有乾沙地和草地，較常積聚細碎垃圾。最棘手係位於淡水河涌附近嘅紅樹林，潮水漲退時，海浪不斷拍打，膠袋、繩索、膠紙和口罩等長條或繩狀垃圾，纏掛喺紅樹枝葉上，一棵棵紅樹頓成「聖誕樹」。拆走紅樹上嘅垃圾十分費時，我一個人花三、四個鐘才收集到一細袋廢物。依我觀察，相比大嶼山其他同樣向東嘅海灘，水口係特別多背心膠袋。 除此之外，靠近岸邊有一大片紅樹林和海濱植物，都有垃圾藏喺入面。後灘位置有一種類紅樹植物名為黃槿，樹根生長錯綜複雜，加上周圍嘅紅樹林密密麻麻，我哋義工亦好難走入去清理。
我好鍾意潮間帶和紅樹林生態環境，每次到水口灣淨灘，唔止專注執垃圾，亦會留意身邊嘅動物，尤其是蟹類。水口泥灘有好多唔同物種嘅蟹，例如寄居蟹、招潮蟹，我最鍾意就係和尚蟹。佢個樣唔似真蟹，好卡通，似塑膠玩具，藍藍紫紫嘅身軀，圓碌碌似一粒波，所以亦叫做波子蟹。佢唔似其他蟹打橫走，而係會打直行，好得意、好獨特。
我喺其他國家見過嘅和尚蟹，會像軍隊式大遷徒，懶理人類喺旁邊行過。但香港嘅和尚蟹好怕人類，唔知係咪因為夏天多遊人摸蜆，令到啲蟹對環境好敏感，特別警惕，一有風吹草動就以螺旋式鑽入沙泥，死都唔出嚟。不過，佢哋翻泥覓食嘅地方會留下痕跡，挖沙時又好大聲，你就知道佢哋存在。每當捕到佢哋現身，我就會蹲低靜靜觀察、影相。我常常諗，堅持淨灘就係為咗呢班蟹仔嘅屋企乾淨啲。 水口灣生態豐富，我哋更加要好好保育和守護呢個地方。遊客習慣直接走入泥灘掘蜆，好少留意近岸堆積嘅垃圾。我希望遊人多啲自覺，除咗掘蜆，亦記得帶走啲垃圾，最好一人拆一棵「聖誕樹」先走啦！亦希望大家能夠持續監察和研究水口垃圾堆積嘅成因，從根源解決問題，愛護我哋嘅大自然。
