- Hayes, J. (1983). The rural communities of Hong Kong : studies and themes. Hong Kong: Oxford University Press.
- 珍姐口中的嘉道理農場，是指其前身「嘉道理農業輔助會」，簡稱農輔會，由羅蘭士及賀理士嘉道理兄弟創辦，為有需要的農民派發物資和協助農民種植農作物。（資料來源：https://www.kfbg.org/tc/history-and-heritage/the-early-days）
馮瑞珍（珍姐）
馮瑞珍出生於1946年，是水口村原居民，父親馮有昇在戰後曾當村長。珍姐在石壁水塘做過泥工，20歲時則到荃灣塑膠廠、製衣廠工作。珍姐交遊廣闊，喜歡到處遊玩和結識朋友。她年少時會到山邊採草藥，然後走路到梅窩坐船出港島，再賣給藥材舖。她也跟隨父親外出與官員聯誼，或到父親朋友的店舖玩樂和遊電車河。
撰文／張凱琳｜攝影／朱煒傑｜編輯／王家文
我喺1946年出世，原名馮裕新。辦身份證時，職員話我個名唔似女仔，我就改為馮瑞珍。媽媽在我三歲時過身，爸爸馮有昇1899年出世，喺水口村讀過卜卜齋1，和平後佢做水口村村長。 爸爸喺村內辦學，由水口學校創校起就擔任校監，直到年老70幾歲才退下來。佢幫村民做好多事，例如村民有需要，佢就聯絡嘉道理農場2提供牛、豬、雞等家畜，以及菠蘿等果樹來種，支援農民生計。 我和爸爸感情好好。佢不時會出港島與官員聯誼。朝早我做完田務，下晝就跟佢去相熟朋友嘅舖頭玩。後來我熟路了，就自己去搭電車遊車河，由堅尼地城到筲箕灣，鍾意就落車周圍行，仲去過胡文虎（虎豹別墅）。以前我好百厭㗎，會同姊妹去長洲「出會」（太平清醮），過咗中秋節，又會跟姑姐去東涌沙咀頭侯王廟睇神功戲。以前無得預先買飛，就咁擔張凳仔去戲棚睇戲。 我曾經喺水口學校讀過一年書，但後來就無讀啦，因為要做田務，朝早使牛食草，早晚兩次去水坑擔水。我12歲時，姐姐出嫁，我更要擔起成個家。不過這種生活都好開心，因為落完田就可以到海灘玩、去坑河游水。 坑河係由鳳凰山流下來嘅水，溪流貫穿水口村。河中上游嘅水較清，是飲用水，中下游洗衫，再流落到田地，就用來灌溉。坑河水好深，入面有好多動物，河蝦、坑鰻（花錦鱔）。𠵱家泥沙多咗，水又少咗，再無人落去游水啦。
阿爸唔使工作嘅日子，我就跟佢上山採藥，由朝早七八點到下午三四點。採集返來嘅草藥會放喺屋外空地曬乾，再分裝入麻包袋。我會擔出去西環賣畀藥材舖，每次只賣到十零廿蚊，唔值錢㗎，但屋企嘅油鹽糖同火水全部都要用錢買，走唔甩。阿爸有啲草藥知識，因為戰時有個男人逃難到水口，喺我哋舊屋住過一段時間。佢離開前送咗一本醫書畀阿爸，教佢用藥。後來日本仔來到，燒毁我哋幾間屋，醫書就遺失咗。 我成日話年輕人要學習睇農曆，在不同季節吃時令果實，春夏季尤其多花果。農曆四月有酸味果（酸藤果），酸味果葉可以生食，生津解渴。布渣葉（破布葉）、雞骨草、露兜果，可以煲涼茶。農曆五月端午節製作鹼水糭，就會用到山稔樹樹枝，將佢燒成木灰後浸水，再用竹籮濾出鹼水，又會摘蕉葉或露兜葉來包糭。到農曆六七月，好多植物結成果實，有山稔、油甘子和雞屎果（又稱花稔，即番石榴）。我以前通山跑，會摘野果食。油甘子係七姐誕（七夕）的其中一種供品，數量多嘅話，可以用來醃製，味道有如鹹柑桔。秋冬季節無乜花果，以前村民就斬柴木、收集芒萁草，準備過冬，燒柴燒草取暖。 「靠山食山，靠海食海」，以前嘅食物和日用品都係就地取材。以前我哋會整瀨鑊邊，我掘到沙白和石蠔後，經過田地就摘啲唐芹和蔥返屋企，先用粘米粉開粉漿，以沙白和蠔肉，配上冬菇、唐芹和蔥煮湯底，再喺鑊邊瀨（酹）粉漿，粉漿煮熟成形後，就鏟起放入湯撈埋食。而山上植物亦有用來做日用品，例如有一種攀藤植物叫海金沙，採摘曬乾後，紮起來就可以當鑊刷、清潔廚具。計我話，你識就當係寶，你唔識就當係草！
我曾在石壁水塘做泥工，20歲時到荃灣製衣廠和塑膠廠返工，當時有個親戚因為政府興建石壁水塘，由石壁搬到荃灣，我向佢租地方住。婚後，我和家人住過大窩口徙置區，後來搬到青衣，住了40幾年，喺六七十年代就望住荃灣、青衣發展。現時返來水口同子女一齊住。 我細個常常去大澳、梅窩，因此認識唔少朋友，到𠵱家仲會一齊飲茶㗎。農曆十二月十六日尾禡還神，我會邀請朋友來水口村一齊切乳豬、拜大王爺。我又鍾意行路，有時一個人就係咁行，行去塘福和石壁都只係半個鐘，濕濕碎啦。𠵱家年紀大，骨頭硬，唔行就生鏽㗎。郁動吓筋骨，血氣就順啲囉。