喬建欣（Judy）
喬建欣曾在嘉道理農場和菜聯社1工作，擁有超過20年自然保育及教育經驗。2021年她出任香港伍倫貢學院講師期間，夥拍資深生態教育工作者張思敏博士和趙善德博士，開展「大嶼山風水林」計劃2。三人走訪大嶼山十個風水林，進行動植物生態調查，並透過展覽、講座及導賞團等，推廣本地風水林的生態和文化價值。
撰文／張凱琳｜攝影／朱煒傑｜編輯／王家文
「大嶼山風水林」計劃開展時遇上新冠疫情，我哋花咗接近三年先完成。根據漁農自然護理署2002年全港風水林普查，大嶼山共有十個風水林，水口係其中之一。第一年我哋團隊進行實地考察，確認每個風水林位置、大小，同時辨認動植物物種，又跟當地居民交流，了解佢哋嘅生活方式，點樣善用自然環境資源。之後我哋透過講座、展覽，讓更多人認識大嶼山嘅風水林，亦帶領過12次導賞團，主要選址梅窩白銀鄉同水口風水林，因為地理位置方便，樹林環境亦適宜。2023年我哋出版書刊《大嶼山風水林》，詳細介紹研究成果，亦附有專題單張、植物辨認卡，喺帶領導賞團時畀參加者使用。 2021年我擔任香港伍倫貢學院講師。之前喺嘉道理農場工作時，認識思敏（張思敏）同趙博士（趙善德），大家都係從事教育行業，於是着手合作設計一個教育項目計劃。我哋三個有唔同技能，可互相補足。趙博士係植物專家，主要負責生態考察同辨認植物，佢最鐘意同村民傾偈，傾唔停㗎！思敏係雀鳥、兩棲爬行動物專家，有豐富導賞經驗，所以由佢設計導賞路線。我就負責統籌同監督整個項目，亦參與生態考察、攝影、帶領導賞團等。 計劃以民族植物學為切入點，記錄村民善用植物資源嘅傳統知識同經驗。民族植物學屬於人類學範疇，會研究族群使用植物方式嘅異同。例如我哋喺北大嶼遇過來自汕頭嘅新移民，佢哋將苦刺心（白簕）當成寶，但香港人就好少用。籌備過程中我哋遇到唔少有趣事情同新發現，因為關於香港大嶼山風水林嘅研究文獻唔多，我哋邊做邊學。最記得有次思敏被一隻體長60厘米嘅中型麻鷹（黑鳶）突襲！當時正值春季麻鷹築巢，每逢我哋入林時，有隻鷹喺附近不斷鳴叫。當思敏離隊一個人行嘅時候，麻鷹就趁機從後飛埋來。我哋先知道之前嘅鳴叫原來係警戒聲，但一直不以為然，呢段經歷正正反映我哋對林中生態唔夠熟悉，更加要學習點樣同自然相處。
風水林係香港古老嘅天然樹林遺跡。舊時村民按照風俗傳統，有計劃咁上山種樹，再以文化習俗形式保護，所以風水林往往能保存幾個世紀。相比普遍山坡嘅稀疏草灌叢，風水林嘅樹木種類同布局亦有明顯差異。根據我哋觀察，大嶼山嘅風水林入口，常見有土地公石像，又稱伯公，象徵邊界守衛。樹林左右方有竹林圍住，有屏障保護作用 。樹林前方亦係最接近村落嘅地方，村民會種植荔枝、黃皮等果樹，再往山上高處就種樟樹、土沉香，最後一排通常係松樹。 水口村風水林位於村嘅後方，背靠山巒，面積達1.23公頃。從鳳凰士多旁邊斜路行上去，就會見風水林入口，亦設有土地公石像。雖然外圍竹林唔明顯，但入面種咗又高又壯嘅樟樹。樟木係村民製作家具嘅木材原料，鋸開後有強烈氣味，能夠驅蟲；而樟木亦象徵和平、健康同長壽。 大嶼山村落多數由多個氏族組成，偏向着重風水林功能，未至於涉及玄學。成熟樹林有效阻擋觸發山泥傾瀉嘅泥石流。夏天時有助降溫，為村落帶來涼爽山風；到冬天旱季，高大樹木更可抵擋寒冷季候風，提供宜人嘅居住環境。風水林亦係天然防火牆，避免山火迅速蔓延。以前村民共同打理樹林，定期修剪同收採各種植物資源，例如柴薪、果實等，仲有草藥，好似破布葉、三椏苦同海金沙係傳統涼茶廿四味嘅材料。村民亦會賣草藥，賺錢幫補屋企開支。 走訪水口村時，我哋認識咗鳳凰士多榮叔（榮老闆） ，佢知道我哋來意後，好熱情咁分享細個時跟爸爸入樹林嘅經歷，以前村童嘅娛樂就係一齊上山捉昆蟲。後來我哋帶領導賞團，遇到居住水口嘅學生，但佢從未聽過水口風水林。現今村民唔使依賴風水林資源，50歲以上嘅老一輩都好耐無入林，年輕村民更加唔認識，與身處環境嘅聯繫已經斷裂咗。我入林時，一路上被帶刺嘅攀藤植物纏住，好狼狽，多得趙博士幫我整走。我哋每次帶備細剪刀，邊行邊開路，望住密密麻麻嘅蜘蛛網，就知道村民好少入林，放狗都唔行經啦。
風水林生態豐富，濫伐亂採係文化禁忌。以前村民根據風俗傳統保護同管理樹林，確保可持續採集，防止植物資源被過度消耗。所以教育後代善用同保護樹林資源係好重要，先可以培育出茂密成熟嘅樹林，展現人同自然和諧相容嘅關係。但係近十幾年間，有唔少人惡意斬伐樹木，尤其係土沉香，造成無法逆轉嘅破壞。 另一個保育風水林面臨嘅困境，來自於少人管理樹林。當村民唔再依賴樹林資源，唔再定期入林修剪植物，任由植物生長，樹種分布嘅界線就變得模糊。譬如，入侵物種薇甘菊等攀藤植物不斷生長，遮蓋大片樹冠，令矮灌木叢缺乏陽光照射，部分生長不良嘅樹木甚至被茂密嘅藤蔓壓倒。最終，風水林同周邊樹林（即香港普遍的次生林5）無乜分別。林木需要適當修剪打理，先可以維持樹林健康。 棲息地多樣化，對整體生態比較好。雖然喺學術上，風水林嘅消失對本地物種實際影響仍未完全搞清楚，但我哋團隊認為，至少現階段先保留風水林，以免消失後，到想再保育時經已錯失良機。所以我哋想加強教育風水林知識，保護呢一片珍貴嘅生物人文地理景觀。