採訪／張凱琳｜撰文／朱皓澄｜攝影／朱煒傑｜編輯／王家文
我叫陳鎮祥，1931年上海出世，九歲時被人收養，輾轉嚟到水口。呢家人本身有兩個女，分別成為我嘅家姐同阿妹。後來家姐嫁咗去塘福，阿妹就嫁咗出九龍。我結婚後一直同太太住喺水口，太太姓池，係大浪灣石壁人。我哋結婚幾年後，石壁先至起水塘，佢哋成條村都要搬，好多石壁人包括我太太嘅阿哥、兩個姊妹都去咗荃灣。水口村民都唔係個個留喺度，我有七個仔女，好耐以前都出晒市區讀書、工作啦。 我住緊呢間屋用麻石興建，好穩陣，打風都無事。嗰時搵咗三個長洲人起屋，總共1,000蚊工錢，做咗兩、三個月左右。麻石來自水口海灘，請人打石再擔返嚟，三毫子一塊。以前住後面間泥磚屋，嗰陣時邊有錢起屋？打風落雨會滲水，成間屋濕晒！ 細個時日本仔嚟到，佢哋會捉我哋養嘅雞，又叫村民上山鋸樟木，然後要村民將木材搬去塘福，再抬上船。幫手搬木嘅人無錢收，不過可以收到佢哋畀嘅米。 以前屋企種禾（稻米）、種粘米1。種禾要睇節氣，知道幾時係小暑、大暑，就知道幾時割禾。我哋有牛耕田，隻牛喺大澳買，買完行路拖返嚟水口。唔騎得㗎，一騎佢就跑！收成之後要除穀、碾米，早年在家用碓臼2碾米，後期就擔去大澳碾米。碾完嘅米攞去長洲賣，每次攞十幾擔，換到錢就買食油、鹹魚。除咗種禾，仲有喺長洲買豬同雞返嚟養。雞生咗蛋，都係賣去長洲，每次攞十幾隻，每隻賣得幾個仙，好平咋！
我又試過斬柴攞去長洲賣，再買米返嚟，因為天旱無雨落，無水耕田，啲禾死晒。有雨落就有水，嗰時種禾用山上面流落嚟嘅坑水，平日食飯、飲水、沖涼都係用坑水。我每日攞兩個木桶去屋後面嘅水坑擔水返嚟用，上下晝各擔一轉，每轉擔六桶，返到嚟用甕裝水。落緊雨都要去擔水，唔會接雨水嚟用，雨水太渾濁。 舊時兩、三個禮拜去一次長洲，搵多兩個人一齊借隻蝦艇，從水口海灘搖櫓過去，大概要一個鐘。多數等風平浪靜先去，如果遇上逆風，最耐要四個鐘先去到，仲要用雙手划船。每年農曆三月初三，長洲人都會由市區請人去北帝廟（玉虛宮）做大戲3，我年年都有睇，嗰陣新馬仔4都有嚟㗎，我有睇到！ 後來起石壁水塘，我去幫手開馬路（即現時的嶼南道），用翻釘鋤開山上泥石，由石壁水塘一路鋤到塘福。無鏟泥機幫手，全部人手鋤㗎，人工大概係五蚊一日，做咗兩、三年。 水塘起好之後，坑水少咗好多，少到種唔到禾，只好種果樹。我喺橫壟種番鬼荔枝、黃皮，另外兩塊田就種菠蘿同蕉樹。番鬼荔枝亦會攞去長洲賣，五毫子一斤。記得以前細個時，見到日本仔食完番鬼荔枝，我就已經執啲核嚟種。菠蘿就喺梅窩買返嚟種，嗰時種好多呀，收成時一朝早可以收到五、六擔，再去梅窩搭船，攞出中環賣，大概兩毫子一斤。細女小時候幫手摘吓黃皮、番鬼荔枝，菠蘿多刺容易整親，佢就無打理。 我40歲左右入水務局（水務署前身）做雜工，負責清理石壁水塘附近嘅渠道，一路做到65歲退休。𠵱家無再種果樹啦，不過屋企門口仲有棵黃皮樹，得閒打理吓，亦會喺以前塊禾田種菜，生菜、紅蘿蔔、花生、白菜仔，乜都種吓，收成之後自己食，又送畀鄰居，唔賣㗎啦！
